අමෙරිකානු අනාගත ජනපති ඩොනල්ඩ් ට්රම්ප් ඉදිරි රජයේ නව නීතිපතිවරිය ලෙස ට්රම්ප්ගේ දීර්ඝ කාලීන මිතුරුකම් සහිත නීතිඥවරියක වන පෑම් බොන්ඩි නම් කර ඇත. නීතිපති ධුරය සඳහා මැට් ගේට්ස් සිය නම ඉවත් කර ගැනීමෙන් පසු ට්රම්ප් මෙම පත්කිරීම යෝජනා කර තිබේ.
බොන්ඩි මහත්මිය මින් ඉහත ෆ්ලොරිඩා හි නීතිපති ලෙසද සේවය කර ඇති අතර ට්රම්ප්ගේ පළමු සෙනෙට් දෝෂාභියෝග නඩුවේදී ඔහුගේ නීති කණ්ඩායමේ ද සිටියාය. ට්රම්ප්ගේ නිව්යෝක් හි මුදල් ගෙවීමේ නඩුව අතරතුර උසාවියට පැමිණ ඔහුට ප්‍රසිද්ධියේ සහය දැක්වූයේද ඇයයි.
පෑම් බොන්ඩි වසර 20ක් පමණ නීතිපතිවරියක ලෙස කටයුතු කර තිබෙන බවත්, එහිදී ඇය ප්‍රචණ්ඩකාරී අපරාධකරුවන්ට එරෙහිව දැඩි ලෙස කටයුතු කර ෆ්ලොරිඩා පවුල් වල ආරක්ෂාව තහවුරු කළ බවත් ට්රම්ප් සිය තේරීම නිවේදනය කරමින් සමාජ මාධ්‍ය පණිවිඩයක සඳහන් කළේය.
2016 වසරේ සිට ට්රම්ප් සමග සමීප සම්බන්ධතා පැවැත්වූ පෑම් බොන්ඩි, මෑත ට්රම්ප් රැලියකදී ඇය ඔහුව “මිතුරෙකු” ලෙස සලකන බව ඡන්ද දායකයින්ට පැවසුවාය.
ට්රම්ප් ජනපතිවරයා ලෙස දිවුරුම් දෙන්නේ ජනවාරියේය. එරට සම්ප්‍රදාය අනුව තම පාලන කාලයේ තනතුරු සඳහා යෝජනා දැන්ම ඉදිරිපත් කළ හැකිය.
සෙනෙට් සභාව විසින් තහවුරු කරනු ලැබුවහොත්, පෑම් බොන්ඩි රටේ ප්‍රධාන නීතිය ක්‍රියාත්මක කිරීමේ නිලධාරිනිය බවට පත්වනු ඇති අතර, සේවකයින් 115,000 කට වැඩි සංඛ්‍යාවක් සහ ඩොලර් බිලියන 45 ක (පවුම් බිලියන 35.7) පමණ අයවැයක් සහිත අධිකරණ දෙපාර්තමේන්තුව භාරව කටයුතු කරනු ඇත.
