බැංකොක් නුවරදී අද (21) අවසන් වටය පැවැත්වීමට නියමිත 2025 විශ්ව රූ රැජින (Miss Universe) තරගාවලිය දැඩි මතභේදාත්මක තත්ත්වයකට මුහුණ පා තිබේ. අවසන් තරගයට පෙර තරග විනිසුරු මඩුල්ලේ ප්‍රධාන සාමාජිකාවන් තිදෙනෙකු හදිසියේ ඉල්ලා අස්වීමත් සමඟ මෙම අර්බුදය නිර්මාණය වී ඇත. ඊට අමතරව සංවිධායකයින්ට විරෝධය පා මෙක්සිකානු තරගකාරියද ඉවත්ව ගොස් ඇත.
ඉතාලි රජ පවුලේ සාමාජිකාවක වන කැමිලා ඩි බෝර්බන් කුමරිය විනිසුරු මඩුල්ලෙන් ඉවත්ව ගිය තෙවන සාමාජිකාව වන අතර, මීට පෙර ප්‍රංශ පාපන්දු ක්‍රීඩක ක්ලෝඩ් මැකෙලෙලේ සහ සුපිරි සංගීතඥ ඕමාර් හාර්ෆූෂ් ද විනිසුරු මඩුල්ලෙන් ඉවත් විය. සාමාන්‍යයෙන් සාමාජිකයින් අට දෙනෙකුගෙන් සමන්විත විනිසුරු මඩුල්ල මේ වන විට පස් දෙනෙකු දක්වා අඩු වී ඇති අතර, පුරප්පාඩු පිරවීමට 2005 විශ්ව රූ රැජින වූ කැනඩාවේ නටාලි ග්ලෙබෝවා කැඳවා තිබේ.
විනිසුරු මඩුල්ලෙන් ඉවත් වූ ඕමාර් හාර්ෆූෂ් තරග සංවිධායකයින්ට එරෙහිව බරපතල චෝදනාවක් එල්ල කරමින් පවසා ඇත්තේ, විනිසුරු මණ්ඩලය පත් කිරීමටත් පෙර සිටම සංවිධායකයින් විසින් අවසන් තරගකරුවන් 30 දෙනා නිල නොවන මට්ටමින් තෝරාගෙන තිබූ බවයි. සංවිධායකයින් සමඟ පෞද්ගලික සබඳතා ඇති තරගකාරියන් මෙලෙස අසාධාරණ ලෙස තෝරාගෙන ඇති බවත්, තමන්ව නොමඟ යවා මෙම වැරදි ක්‍රියාවලියට අනුමැතිය ලබා ගැනීමට උත්සාහ කළ බවත් ඔහු සඳහන් කර ඇත. මෙම සිදුවීම නිසා තම කීර්ති නාමයට හානි වූ බවත් සංවිධායකයින්ට එරෙහිව නීතිමය ක්‍රියාමාර්ග ගන්නා බවත් ඔහු සමාජ මාධ්‍ය ඔස්සේ ප්‍රකාශ කර තිබේ. මේ අතර පෞද්ගලික හේතූන් මත තමන් ඉවත් වන බව ප්‍රංශ පාපන්දු ක්‍රීඩක මැකෙලෙලේ ඉන්ස්ටග්‍රෑම් පණිවිඩයක් මගින් දැනුම් දී ඇත.
තවත් ආන්දෝලනාත්මක සිදුවීමක් ලෙස මෙක්සිකෝව නියෝජනය කළ ෆාතිමා නම් තරගකාරිය තරගයෙන් ඉවත් වීමට තීරණය කර තිබේ. ප්‍රවර්ධන කටයුතු සඳහා අදාළ අන්තර්ගතයන් සමාජ මාධ්‍යයේ පළ නොකිරීම හේතුවෙන් නවාත් නමැති සංවිධායකවරයා ඇයට මෝඩියක යැයි පවසා අපහාස කර ඇති අතර, ඊට විරෝධය පළ කළ විට ආරක්ෂක අංශ කැඳවා ඇයව පන්නා දමන බවට තර්ජනය කර ඇත. මෙම සිද්ධියෙන් පසු ඇය තරගයෙන් ඉවත් වූ අතර, ඇයට සහාය පළ කරමින් තවත් තරගකාරියන් පිරිසක් විරෝධය දැක්වූහ. සමාජ මාධ්‍ය ඔස්සේ ‘ජස්ටිස් ෆෝ ෆාතිමා’ (JusticeForFatima) යනුවෙන් විරෝධතා ව්‍යාපාරයක් ආරම්භ වීමත් සමඟ අදාළ සංවිධායකවරයා ප්‍රසිද්ධියේ සමාව ඉල්ලා සිටියේය.
තරගාවලියේ මූලික වටයේ තරග පැවති නොවැම්බර් 19 වන දින ජැමෙයිකාව නියෝජනය කළ වෛද්‍ය ගේබ්රියෙල් හෙන්රි වේදිකාව මත ඇවිද යමින් සිටියදී හදිසියේ ඇද වැටුණු අතර ඇයව වහාම රෝහල් ගත කිරීමට පියවර ගැණින. කෙසේ වෙතත් වෛද්‍යවරුන් තහවුරු කර ඇත්තේ ඇයගේ ජීවිතයට කිසිදු අවදානමක් නොමැති බවයි. මෙවැනි බාධා මධ්‍යයේ වුවද ලොව පුරා රටවල් 80කට අධික සංඛ්‍යාවක සහභාගීත්වයෙන් පැවැත්වෙන මෙම තරගාවලිය ඉදිරියට පවත්වාගෙන යාමට සංවිධායකයෝ කටයුතු කරමින් සිටිති. 1952 වසරේ ආරම්භ වූ මෙම තරගාවලියේ ජයග්‍රාහිකාවට වසරක ජාත්‍යන්තර ගිවිසුමක් හිමි වන අතර ඇය ලොව පුරා සමාජ සත්කාර සහ දැනුවත් කිරීමේ වැඩසටහන් සඳහා දායක විය යුතුය.
මෙවර තරගාවලිය සඳහා ශ්‍රී ලංකාව නියෝජනය කරමින් ලිහාසා ලින්ඩ්සේ තරගකාරිය සහභාගී වන අතර ඇය එම අන්දෝලනය ඇති කළ වටයට තෝරාගත්තේදැයි පැහැදිලි නැත
