“ස්තුතියි” කියන්න මතක් කරගන්න දිනයක්… ගුරු දිනය අදයි ! හෙට දවස ලස්සන කරන්න, අද දවසේ දැනුම බෙදාදෙන , සියලුම ගුරුවරුන්ට ආදරයෙන් සහ ගෞරවයෙන්…
“ගුරුවරයා” කියන්නේ පන්ති කාමරයක පාඩම් උගන්වන පුද්ගලයෙකුට පමණක් සීමා වූ නමක් නොවෙයි. අපේ ජීවිතයේ හරි මඟ තෝරාගන්න, වැරදිවලින් ඉගෙනගන්න, අභියෝග හමුවේ නොවැටී ඉදිරියට යන්න අපට ශක්තිය ලබාදෙන අයෙකු ලෙස ගුරුවරයා හඳුන්වන්න පුළුවන්.
අද ගුරු දිනය සමරන මේ මොහොතේ, අපේ ජීවිතයට වටිනාකමක් එක් කළ සෑම ගුරුවරයෙකුම ආදරයෙන් සහ ගෞරවයෙන් සිහිපත් කළ යුතුයි.
පාසල් කාලයේදී ඇතැම් විට ගුරුවරුන්ගේ අවවාද අපට කරදරයක් වගේ දැනෙන්න පුළුවන්. ඒත් කාලය ගතවෙද්දී, එදා කියූ වචනවල සැබෑ වටිනාකම තේරෙන්නේ ජීවිතයේ අභියෝග හමුවේ අපි තනිව තීරණ ගන්නා විටයි.
පොතේ තිබෙන විෂය කරුණු පමණක් නොවෙයි, ජීවිතය ගැනත් ගුරුවරු අපට උගන්වනවා. විනය, කරුණාව, අවංකකම, වගකීම, අන් අයට ගරු කිරීම සහ තමන්ගේ සිහින වෙනුවෙන් කැපවීම වැනි වටිනාකම් අපේ ජීවිතයට එක් කිරීමට ඔවුන් විශාල දායකත්වයක් ලබාදෙනවා.
ගුරුවරයෙකුගේ වචනයකින් අධෛර්යමත් වූ දරුවෙකුට නැවතත් විශ්වාසය ලැබෙන්න පුළුවන්. ගුරුවරයෙකුගේ කුඩා ප්‍රශංසාවක්, තමන් ගැන විශ්වාසයක් නැති දරුවෙකුගේ මුළු ජීවිතයම වෙනස් කරන්නත් පුළුවන්.
ඒ නිසා ගුරු දිනය කියන්නේ තෑග්ගක් දීලා, සුබ පැතුමක් යවලා අවසන් කරන දිනයක් පමණක් නොවෙයි.
අපි අද සිටින තැනට පැමිණීමට මඟ පෙන්වූ ගුරුවරුන්ට “ස්තුතියි” කියන්න මතක් කරගන්න දිනයක්.
අද අප අතර නැති ගුරුවරුන් සිටියත්, ඔවුන් අපට කියා දුන් වචන තවමත් අපේ මතකයේ ඇති. පාසලෙන් සමුගෙන වසර ගණනාවක් ගතවුණත්, “මගේ ගුරුවරයා,ගුරුවරිය මට එදා කියපු කතාව” කියලා සිහිපත් වන අවස්ථා ඕනෑ තරම් තිබෙනවා.
එවැනි ගුරුවරුන්ට අද අපේ හදවතින්ම කියමු…
“අපේ ජීවිතයට දැනුම පමණක් නොව, ජීවිතය ජයගන්න මගත් කියා දුන්නාට ඔබට ස්තුතියි.”
ගුරු දිනය සමරන අද දිනයේ, අපේ අනාගත පරපුර වෙනුවෙන් දැනුම බෙදාදෙන, දරුවන්ගේ සිහින හඳුනාගෙන ඒවා පසුපස යන්න ශක්තිය ලබාදෙන සියලුම ගුරුවරුන්ට අපගේ උත්තමාචාරය.
සුබ ගුරු දිනයක් වේවා!
අපේ ජීවිතවලට ආලෝකයක් වූ සියලුම ගුරුවරුන්ට උපහාරයක් වේවා !
