මේ දිනවල මෝටිවේෂන් කතාවක් නිසා සමාජ මාධ්‍ය තුළ කථාබහට ලක්වන දිමුතු සඳමාලි රාජපුත්‍රගේ පියාණන් වන ප්‍රකට ව්‍යාපාරික ඩඩ්ලි සිරිසේන මුහුණුපොතේ තැබූ සටහනක් නැවතත් කරළියට පැමිණ තිබේ.
එහිදී ඔහු පවසන්නේ ප්‍රතිරූප ගැනයි. ඒ මෙසේය.
සමාජය තුළ බොරු ප්‍රතිරූප මවාගෙන ඒවා නඩත්තු කරන්න මහන්සි අරගෙන නිකරුණේ විනාස වුණ අය ඕන තරම් මගේ ජීවිත කාලය තුළ මම දැකල තියනවා. ඒ නිසා මේ කතාව මම කියන්නෙ දියුණු වෙන්න උත්සාහ කරන ඔයාලට.
අනූව දශකයේ මුළදි මම ඉස්-ඉස්සෙල්ලාම වී මෝලක් ආරම්භ කළාම ඒකෙ නිෂ්පාදන වලට ඕන කරන වී මිලදී ගත්තෙ ලක්සඋයන, ජයන්තිපුර, උණගලාවෙහෙර සහ ඇතුමල්පිටිය වගේ ප්‍රදේශ වල ගොවියන්ගෙන්. ඒ කාලෙ හැටියට බිස්නස් එක වෙනුවෙන් ලොකු මුදලක් එකවර යට කරන්න අතේ නැති වුණත්, ඒ මිලට ගත්ත වී ටික සහල් කරගෙන ඒ අයගෙ මුදල බේරනකල් ගොඩක් අය මං වෙනුවෙන් බලාගෙන ඉඳපු අතීතයක් තමයි මට තිබුණෙ.
හැබයි කිසිදවසක හොරයක් බොරුවක් නැතුව විශ්වාසය රැකගෙන ගොවියන් එක්ක ගණුදෙනු කරපු මං ගැන මුලු පොලොන්නරුවම දැනගන්න ගතවුණේ බොහොම ටික කාලයයි. එදා පොලොන්නරුවේ ප්‍රදේශ කිහිපයකට සීමා වෙලා බිස්නස් කරපු මම අද වෙනකොට මුලු ලංකාවම දන්න කියන ව්‍යාපාරිකයෙක් බවට පත්වෙලා තියෙන්නෙ ඔන්න ඔය රැකපු විශ්වාසය නිසයි. එතනින් නොනැවතී අද වෙද්දි යුරෝපය වෙනකල්ම ලංකාවෙන් සහල් අපනයනය කරන ප්‍රධානතම ව්‍යවසායකයාත් මම වෙලා ඉවරයි.
ඉතින් ඒ ගොඩ දෙනක් අදටත් ඒ අයගෙ වී ටික අරගෙන එන්නෙ මගේ ගාවට. මම කවදාවත් ඒ අය ඉදිරියේ එදා ඉඳපු ඩඩ්ලි මහත්තයා ඇරෙන්න කිසිදවසක සර් වෙන්න ගිහින් නෑ. ඒ නිසා ඉස්සෙල්ලා ඔබ ඔබම වෙන්න. තමන්ටම ආවේණික වූ රටාවකට ජීවිතය හැඩගස්වාගෙන සමාජය තුළ දියුණු වෙන්න බලන්න.
මොකද ඉස්කෝලෙදි තව කෙනෙක්ගෙන් කොපි කරල පේපරයක් ලිව්වට, ජීවිතේ කියන පේපර් එක ලියන්න වෙන්නෙ තනියම. මේ පහලින් තියන පින්තූර වල ඉන්නෙ එදා ඉඳන්ම මං ගාවට එන්න ගොවියො. ඉතින් ඒ අය ගාව මම අදටත් හැසිරෙන්නෙ එදා ඉඳපු ඩඩ්ලි විදියටම තමයි. මොකද ජීවිතේ පුලුවන් තරම් සරල වුණාම, වැටුණු වෙලාවට අපිට දරාගන්න ලේසියි. ඒ වගේම වැටුණාට වඩා වේගයෙන් අපිට නැඟිටින්නත් පහසුයි. එහෙනම් ආදරණීය දරුවනි, ඔයාල හැමෝටම සුබම සුබ දවසක්. සුබ උදෑසනක්..!”
