ලේ නෑකමට අපේ අසහාය නිළි රැජින මාලනී සෙනෙහෙලතා ෆොන්සේකාට ලේලිය වූ ජනප්‍රිය නිළි සෙනාලි ෆොන්සේකා පසුගිය කාලේ දවස ගෙව්වේ වැඩි හාවක් හූවක් නැතිවයි.
එයා දැන් කෝ?
සෙනාලිට ආදරය කරන හැමෝම වාගේ ඇයව හොයන්න ගත්තා. විශේෂයෙන්ම නාඩගම්කාරයෝ එකේ සුදු චූටිට ඇලුම් කරපු කට්ටිය එතැන හිටියා.
හදිසියෙම වාගේ ඔන්න ආරංචි වුණා ඈ ආයෙමත් කරළියට ඇවිදින්ය කියලා. ‘ආයෙමත්’ කියලා කිව්වේ ඇය කලාවෙන් ඈත්වෙලා හිටියද? කවුරුත් හිතුවේ එහෙමයි. බලමු සෙනාලිගෙන්ම අහලා.
සෙනාලි හුඟක් කාලෙකට පස්සේ නේද මේ?
ඔව්. සෑහෙන කාලෙකට පස්සේ තමයි ළඟකදී ඉඳන් මීඩියාවලට කතාකරන්න ගත්තේ.
හාවක් හූවක් නැතුව හිටපු හේතුව?
මෙහෙමයි. අම්මා හිටි හැටියෙම තදින් අසනීප වුණදා ඉඳන්ම මට අම්මා ළඟින්ම ඉන්න ඕනෙ වුණා. එතැනදී සම්පූර්ණයෙන්ම ෆිල්ම්වලින් ටෙලිවලින් අයින් වුණා. අම්මාගේ වියෝවත් එක්ක හැම දේකින්ම ඈත්වෙලා ටික දවසක් තනියම ඉන්න ඕනෙ වුණා. කාලය නොදැනුවත්වම ගෙවුණා. ඒ අතර සෙනාලි ෆොන්සේකාට ආදරය කරන පිරිස එයාව හොයන බව දැනෙන්න ගත්තම මටත් ඕනෙ වුණා ප්‍රේක්ෂකයෝ ආදරය කරන සෙනාලිව හොයාගෙන යන්න. අන්තිමේදී ඉතින් ඔන්න මම ආයෙම ආවා. එච්චරයි.
ආව ගමන්ම ෆිල්ම් එකක ඇග්‍රිමන්ට් සයින් කළා?
ඔව්. මුහුරත් එක පසුගිය සතියේ තිබුණා.
ෆිල්ම් එක ගැන තව විස්තර ටිකක් කියමු සෙනාලි?
ෆිල්ම් එක ‘සයින් ඔෆ් ලයිෆ්’. ඩිරෙක්ට් කරන්නේ නාලක විතානගේ. ඒක හරිම ලස්සන පවුලේ කතාන්දරයක්. කතා තේමාව කියන්න නම් බැහැ. ඒක දැනට රහසක්.
හැමෝම ඔහොමයි. මුහුරත් එක ගැන කියලා කතා තේමාව රහසක් කරනවා?
කුතුහලය කියන්නේ නැවුම් හැඟීමක්. ඒ වගේම සුන්දර අත්දැකීමක්. ඔය ප්‍රශ්නෙට හොඳම උත්තරේ ඒකයි මං හිතන්නේ.
නාඩගම්කාරයන්ගෙන් පස්සෙයි ඔයා රඟපෑමෙන් අයින් වුණේ?
ඔව්. 2022න් පස්සේ මොනවත්ම බාරගත්තේ නැහැ.
යන්න ගියේ ටෙලි රසිකයෝ සුදු චූටිට වහවැටිලා ඉන්න දවස්වල?
හරිම දුකෙන් යන්න ගියේ. ඒත් ඒ වෙලාවේ එහෙම නොගියා නම් මගේ ජීවිත කාලය පුරාම පසුතැවෙන හැඟීමක් මට ඉතිරි වෙන්න තිබ්බා. තාත්තගේ අවසාන මොහොතේ එයාව මට අතෑරුණා වාගේ මගේ අම්මවත් මට අතෑරෙන්න තිබුණා. එහෙම වුණා නම් කවදාවත්ම මට බැරි වේවි මටම සමාවක් දෙන්න.
ඒ කාලේ ඔයාට ඔයාව අතෑරුණා කියලා හිතුණේ නැද්ද?
ඇයි නැත්තේ? මට මාව අතෑරුණා තමයි. ඒත් මට මගෙ අම්මව එදා අතෑරෙන්න නොදී අල්ල ගත්තා. ඒක හිතට දැනෙනකොට ‘අනේ මොනවා අතෑරුණත් මොකද’ කියලා දැනෙන තරමට මම ආත්මීයව සැනසෙනවා. ඊට එහා තව මොනවද?
හුඟක් සාර්ථක නිර්මාණ ඔයාට දාලා එන්න වුණාලු?
ඇග්‍රිමන්ට් සයින් කරන්න නිර්මාණ කිහිපයක්ම තිබුණා. මං වෙනුවට ඒවායේ රඟපාපු අය අද සම්මාන ගන්නකොට ජනප්‍රිය වෙනකොට ‘අනේ මම නේද ඔතැන ඉන්න තිබුණේ’ කියලා හිතුණු තැනුත් තිබුණා. ඒත් ඒ හැම තැනකදීම හිත හදාගන්න පුළුවන් මිල කරන්න බැරි මෝටිවේෂන් එකක් මගේ අම්මා වෙනුවෙන් මගේ හිත කොනක ඉතිරි වෙලා තියෙනවා. ඒ ඇති මට මුළු ජීවිත කාලෙම සතුටු වෙන්න.
ප්‍රශ්න අහන පිළිවෙළ ඔයාට අවුල්ද? හිටි ගමන් ඔයා සීරියස් වෙනවා සෙනාලි?
අනේ එහෙම නෑ. කොහොමත් අම්මා තාත්තා ගැන කතාකරනකොට මම හුඟක් හැඟීම්බර වෙනවා. ඒකයි එහෙම දැනෙන්න ඇත්තේ.
පහුගිය කාලේ ඕනෑවට වඩා මහත් වුණා. ඇඟ හදාගන්න අමාරු වුණාලු?
ඔව්නේ. දන්නෙම නැතුව මාර විදියට මහත් වෙන්න ගත්තා. ඇඟ හදාගන්න පෙනුම වෙනස් කරගන්න ටිකක් මහන්සි වෙන්න වුණා. තවත් ටිකක් ස්ලිම් වුණා නම් තමයි හොඳ.
හදිසියේ මැරි කළා කියලත් ලොකු රාවයක් ගියා?
ඒකනේ. මමත් ඒක දැක්කා. සෝෂල් මීඩියාවල මාව විතරක් නෙවෙයි, තව තව නිළියන්ව බොරුවට කසාද බන්දවලා තිබුණා. කවුරු හරි ඔහොම දේවල් කරන්නේ මානසිකව මොන මට්ටමේ හරි සතුටක් ලබන්නනේ. ඉතින් ඒ සතුට එයාලා ලබපුවාවේ. අපි මොනවට ඕවට කලබල වෙනවද?
සෙනාලි චැට් ෂෝ රිජෙක්ට් කරනවලු?
රිජෙක්ට් කරන්නේ නැහැ. හැබැයි මට කතාකරන්න දෙයක් නැත්නම් චැට් ෂෝවලට යන්නෙත් නැහැ. සුදු චූටි ජනප්‍රිය වෙනකොට විජයබා කොල්ලයේ නීලමනීට සරසවිය වැනි ජනප්‍රිය නිළි සම්මානය ලැබෙනකොට මට චැට් ෂෝවලට ආරාධනා ලැබුණා. මම ගියා. ඒ මට කතාකරන්න, මං ගැන යමක් තියෙන නිසා.
ඒ වගේ තමයි හේතු පාඨයක් නැතිව මට යන්න හිතෙන්නෙත් නැහැ. එහෙම අපි ගියාම සුදුසු කෙනුට එතැනට යන්න තියෙන අවස්ථාව වුණත් නැති වෙනවා. අනෙක ප්‍රේක්ෂකයා වුණත් අහන්න කියන්න පුළුවන් ‘ඇයි මේ එකම කට්ටිය ගෙන්නන්නේ, වෙන අය නැද්ද?’ කියලා. අන්න ඒ නිසා මම ඒ ගැන හිතනවා. මේක මගේ ප්‍රයිවට් අදහසක් විතරයි.
කතාබහට තිත තියන්නයි සූදානම. හෙට දවස ගැන යමක්?
සෙනාලි ෆොන්සේකා විදියට මම දුර ගමනක් යන්නයි සූදානම. මම බොහෝ විට ඉලක්ක හොයනවා. ඉලක්කවලට බලාපොරොත්තුවලට මං ආසයි. හොඳ චරිත හරහා, හිතට දැනෙන රංගන පෞරුෂයක් හරහා ඒ ගමන යන්න මම හෙමින් හෙමින් ආරම්භය දෙනවා.
දමයන්ති රේණුකා ප්‍රනාන්දු
