විවාහය, අයෙකුගේ ජීවිතයේ තවත් එක තීරණාත්මක හැරවුම් ලක්ෂයක්..
මේ කියන්න යන්නේ විවාහය නැත්නම් රැකියාවක් නැති වෙන කතාවක්..
එක්තරා සමාගමක් විසින් මේ වගේ තීරණයක් ගන්න ඇත්තේ ඇත්තටම තරුණ තරුණියක් විවාහ වීමට දක්වන මැලිකමට විසඳුම් ලබාදෙන්න වෙන්න ඇති.. මේ අන්න ඒ ගැන ඇසෙන කතාවයි.. චීනයෙන් ඇසෙන මේ කතාව දැනගන්න ඔබත් කැමති ඇති නේද..?
චීනයේ ෂැන්ඩොං ප්‍රාන්තයේ පිහිටි සමාගමක් සැප්තැම්බර් මාසය අවසන් වන විට එම සමාගමේ සේවකයින් තනිකඩව හෝ දික්කසාදව සිටියහොත් සේවයෙන් පහ කරන බවට පවසා ඇතැයි විදෙස් මාධ්‍ය වාර්තා කරනවා…
South China Morning Post හි වාර්තාවකට අනුව, Shandong Shuntian Chemical Group Co. Ltd, නම් එම සමාගම එහි 1,200ක් පමණ වන සේවකයින්ට දැනුම්දීමක් නිකුත් කරමින් පවසා ඇත්තේ, ඔවුන් හොඳින් රාජකාරී කර පවුලක් වශයෙන් ස්ථාපිත විය යුතු බවයි..
ඒ අනුව දික්කසාද වූවන් ද ඇතුළුව වයස අවුරුදු 28-58 අතර තනිකඩ සේවකයන්ට මේ වසරේ සැප්තැම්බර් මාසය අවසන් වන විට විවාහ වී පදිංචි විය යුතු බව එම ආයතනය දැනුම් දී තිබෙනවා..
එසේ නොමැතිනම් ඔවුන් ස්වයං විවේචන ලිපියක් ඉදිරිපත් කළ යුතුව ඇති බව සඳහන් කරන අදාළ මාධ්‍ය වාර්තාව පෙන්වා දෙන්නේ, ජුනි මාසය අවසන් වන විට ඔවුන් විවාහ නොවන්නේ නම්, සමාගම ඔවුන් පිළිබඳ ඇගයීමක් පවත්වනු ඇති බවයි…
කෙසේ නමුත් සැප්තැම්බර් අග වන විට ඔවුන් තනිකඩව සිටියහොත් ඔවුන් සේවයෙන් පහ කරන බව පවසා ඇති අතර මෙම තීරණය ගැනීමට හේතුව පෙන්වා දෙන්නේ, “උත්සාහය, කරුණාව, පක්ෂපාතීත්වය, පුත්‍ර භක්තිය සහ ධර්මිෂ්ඨකම” යන ආත්මය සහ සංස්කෘතික වටිනාකම් ප්‍රවර්ධනය කිරීමයි…
