ඇමෙරිකානු ජනාධිපති ඩොනල්ඩ් ට්රම්ප් ග්රීන්ලන්තය ඇමෙරිකාවේ පාලනය යටතට ගැනීමට ඇති තම අභිලාෂය යළිත් වරක් ප්රකාශ කර ඇති අතර, මෙම ප්රකාශය හේතුවෙන් ඩෙන්මාර්කයේ සහ ග්රීන්ලන්තයේ නායකයින් දැඩි කෝපයට පත්ව තිබේ. එයාර් ෆෝස් වන් යානයේදී මාධ්යවේදීන් සමඟ පැවති සාකච්ඡාවකදී ට්රම්ප් පවසා ඇත්තේ ජාතික ආරක්ෂාව සඳහා ග්රීන්ලන්තය අත්පත් කර ගැනීම අතිශය වැදගත් බවත්, එහි රුසියානු සහ චීන නෞකාවල ක්රියාකාරිත්වය අවදානම් සහගත තත්ත්වයක් මතු කර ඇති බවත්ය.
මීට පෙර ද ඔහු මාධ්ය වෙත ප්රකාශ කර තිබුණේ ආරක්ෂක උපාය මාර්ගික කටයුතු වෙනුවෙන් ඇමෙරිකාවට ග්රීන්ලන්තය අත්යවශ්ය බවයි.
ට්රම්ප්ගේ මෙම ආන්දෝලනාත්මක ප්රකාශයට වහාම ප්රතිචාර දක්වමින් ඩෙන්මාර්ක අගමැතිනී මෙටේ ෆ්රෙඩ්රික්සන් පවසා ඇත්තේ ග්රීන්ලන්තය අත්පත් කර ගැනීම පිළිබඳ ඇමෙරිකාවේ අදහස සම්පූර්ණයෙන්ම හාස්යජනක සහ නොවටිනා කතාවක් බවයි. ඩෙන්මාර්ක රාජධානියට අයත් කිසිදු භූමියක් බලහත්කාරයෙන් ලබා ගැනීමට ඇමෙරිකාවට කිසිදු අයිතියක් නොමැති බව අවධාරණය කළ ඇය, තම සමීපතම මිත්ර රටකට එරෙහිව තර්ජනය කිරීම නතර කරන ලෙස ට්රම්ප්ගෙන් ඉල්ලා සිටියාය. ග්රීන්ලන්තයේ ජනතාව තමන් විකිණීමට නොමැති බව ඉතා පැහැදිලිව ප්රකාශ කර ඇති බවද අගමැතිනිය වැඩිදුරටත් පෙන්වා දුන්නාය.
මේ අතර ග්රීන්ලන්ත අගමැති ජෙන්ස් ෆ්රෙඩ්රික් නීල්සන් ද ට්රම්ප්ගේ ප්රකාශය දැඩි ලෙස විවේචනය කරමින් එය තම ජනතාවට කළ අගෞරවයක් ලෙස හැඳින්වූ අතර, ඇමෙරිකානු ජනාධිපතිවරයා ග්රීන්ලන්තය වෙනිසියුලාව සමඟ සසඳමින් හමුදා මැදිහත්වීම් ගැන කතා කිරීම වැරදි සහගත බව පවසා තිබේ. තමන් ස්වාධීන මැතිවරණ සහ ශක්තිමත් ආයතන සහිත ප්රජාතන්ත්රවාදී සමාජයක් බවත්, ජාත්යන්තර නීතියට අනුව කටයුතු කරන බවත් ඔහු අවධාරණය කළේය. මෑතකදී ඇමෙරිකානු හමුදා විසින් වෙනිසියුලානු ජනාධිපති නිකොලස් මදුරෝ සහ ඔහුගේ බිරිඳ අත්අඩංගුවට ගෙන නිව්යෝර්ක් වෙත රැගෙන යාමේ සිදුවීමත් සමඟ මෙම මතභේදය තවදුරටත් උත්සන්න වී ඇති අතර, ට්රම්ප්ගේ මෙම ප්රකාශය හුදෙක් වචනවලට පමණක් සීමා නොවනු ඇතැයි යන සැකය වර්ධනය වී තිබේ.
වෙනිසියුලාවේ ඇමෙරිකානු හමුදා ක්රියාන්විතයෙන් පසුව, ධවල මන්දිරයේ ජ්යෙෂ්ඨ නිලධාරියෙකු වන ස්ටීවන් මිලර්ගේ බිරිඳ වන කේටි මිලර් විසින් ඇමෙරිකානු ධජයේ වර්ණවලින් වර්ණ ගැන්වූ ග්රීන්ලන්ත සිතියමක් “ළඟදීම” යන පාඨය සමඟ සමාජ මාධ්යයේ පළ කිරීම මෙම අර්බුදය තවත් සංකීර්ණ කර ඇත. මෙය ග්රීන්ලන්තය සහ ඩෙන්මාර්කය තුළ ඇමෙරිකානු ආක්රමණයක් පිළිබඳ බියක් ඇති කිරීමට හේතු වී ඇති අතර, ට්රම්ප් දීර්ඝ කාලයක සිට ග්රීන්ලන්තයේ ඛනිජ සම්පත් සහ ආක්ටික් කලාපයේ උපාය මාර්ගික වැදගත්කම ඉලක්ක කර ගනිමින් සිටින බව නොරහසකි. විශේෂයෙන්ම ආක්ටික් කලාපයේ රුසියානු සහ චීන ක්රියාකාරකම් පාලනය කිරීම, නව මුහුදු වෙළෙඳ මාර්ග විවෘත වීම සහ දුර්ලභ ඛනිජ සම්පත්වල පාලනය ලබා ගැනීම ඇමෙරිකාවේ ප්රධාන අරමුණු වී තිබේ.
ඇමෙරිකාව සහ ඩෙන්මාර්කය නේටෝ සංවිධානයේ ආරම්භක සාමාජිකයින් වන අතර දෙරට අතර දීර්ඝ කාලීන ආරක්ෂක ගිවිසුම් පවතී. 1951 ආරක්ෂක ගිවිසුම යටතේ ඇමෙරිකාවට ග්රීන්ලන්තයේ තුලේ ගුවන් කඳවුර පවත්වාගෙන යාමට අවසර ඇති අතර, එය මිසයිල අනතුරු ඇඟවීම් සහ අභ්යවකාශ නිරීක්ෂණ කටයුතු සඳහා ඉතා වැදගත් වේ. කෙසේ වෙතත්, වෙනිසියුලානු ජනාධිපතිවරයා මත්ද්රව්ය ජාවාරම් චෝදනා මත අත්අඩංගුවට ගෙන ඇමෙරිකානු ෆෙඩරල් අධිකරණයක් හමුවට ඉදිරිපත් කිරීමට කටයුතු කිරීමෙන් පසුව, මිත්ර රටක් වන ඩෙන්මාර්කය සමඟ ඇති වී තිබෙන මෙම රාජ්යතාන්ත්රික ගැටුම නේටෝ හවුල්කරුවන් අතර සම්බන්ධතාවලට බලපෑම් එල්ල කළ හැකි බව විචාරකයෝ පෙන්වා දෙති.
