ආපදා සහනයට – සන්නිවේදන ජාලා මගින් නොමිලේ ඇමතුම් හා Data

දිවයින පුරා පවතින අයහපත් කාලගුණික තත්ත්වය හේතුවෙන් පීඩාවට පත් ජනතාවගේ සන්නිවේදන පහසුකම් අඛණ්ඩව පවත්වාගෙන යාම සහ යථා තත්ත්වයට පත් කිරීම පිළිබඳ විශේෂ සාකච්ඡාවක් ඩිජිටල් ආර්ථික කටයුතු නියෝජ්‍ය අමාත්‍ය එරංග වීරරත්න මහතාගේ ප්‍රධානත්වයෙන් 2025 නොවැම්බර් මස 28 වන දින පැවැත්විණි.

විදුලි සංදේශ නියාමන කොමිෂන් සභාවේ (TRCSL) නිලධාරීන්, ආපදා කළමනාකරණ මධ්‍යස්ථානයේ (DMC) නියෝජිතයින්, ත්‍රිවිධ හමුදා නිලධාරීන් සහ ප්‍රධාන පෙළේ විදුලි සංදේශ සේවා සමාගම්වල නියෝජිතයින් සහභාගී වූ මෙම හමුවේදී ආපදාවට ලක්වූවන් වෙනුවෙන් විශේෂ සහන සැලසීමට සියලු පාර්ශ්වයන් එකඟතාවකට පැමිණ තිබේ.

අධික වර්ෂාව සහ නායයෑම් හේතුවෙන් ෆයිබර් (Fiber) ජාල පද්ධතිවලට සිදු වූ හානි නිසා මහනුවර, බදුල්ල සහ අනුරාධපුරය ඇතුළු දිස්ත්‍රික්ක කිහිපයක සන්නිවේදන සේවාවලට බාධා එල්ල වී ඇති බව මෙහිදී අනාවරණය විය.

විදුලිය විසන්ධි වීම සන්නිවේදන කුළුණු ක්‍රියාත්මක කිරීමට ප්‍රධාන බාධාවක් වී ඇති හෙයින්, අදාළ ප්‍රදේශවල විදුලි බලය කඩිනමින් ලබා දීමට කටයුතු කරන ලෙස විදුලි සංදේශ සමාගම් බලධාරීන්ගෙන් ඉල්ලා සිටි අතර, පශ්චාත් ගෙවුම් (Postpaid) පාරිභෝගිකයින්ගේ ණය සීමාව ඉක්මවා ගිය ද ආපදා කාලසීමාව තුළ ඔවුන්ගේ දුරකථන සබඳතා විසන්ධි නොකිරීමට ද මෙහිදී තීරණය කෙරිණි.

මීට අමතරව පෙර ගෙවුම් (Prepaid) පාරිභෝගිකයින් සදහා විශේෂ දත්ත (Data) සහ ඇමතුම් සහන පැකේජයන් හඳුන්වා දී ඇති අතර ඩයලොග් (Dialog) සහ එයාර්ටෙල් (Airtel) පාරිභෝගිකයින්ට #006# අංකය ඇමතීම මගින් දින 3ක් සඳහා වලංගු ඕනෑම ජාලයකට මිනිත්තු 250ක්, SMS 250ක් සහ 1GB ඩේටා දීමනාවක් සක්‍රීය කර ගත හැකිය.

 

හච් (Hutch) පාරිභෝගිකයින්ට 3111# අංකය ඇමතීමෙන් දින 3ක් සඳහා ඕනෑම ජාලයකට විනාඩි 300ක් සහ 1000MB ක ඩේටා ප්‍රමාණයක් නොමිලේ හිමි වන අතර මොබිටෙල් (Mobitel) පාරිභෝගිකයින්ට YES ලෙස සටහන් කර 7677 වෙත SMS පණිවුඩයක් යොමු කිරීමෙන් ඕනෑම ජාලයකට මිනිත්තු 300ක්, SMS 300ක් සහ 1GB ඩේටා පහසුකම් ලබා ගැනීමේ හැකියාව පවතී.

තවද SLT-Mobitel ආයතනය විසින් ස්ථාවර දුරකථන පාරිභෝගිකයින්ට නොමිලේ ඇමතුම් පහසුකම් ලබා දී ඇති අතර Fibre, Home 4G LTE සහ ADSL ඇතුළු ගෘහස්ථ බ්‍රෝඩ්බෑන්ඩ් පාරිභෝගිකයින් සඳහා නොවැම්බර් 29 වන දින උදෑසන 7.00 දක්වා අසීමිතව අන්තර්ජාල පහසුකම් (Unlimited Data) නොමිලේ ලබා දීමට පියවර ගෙන ඇත.