පාකිස්තානය සිය ඉතිහාසයේ ප්‍රථම වරට අරාබි මුහුදේ කෘත්‍රිම දූපතක් නිර්මාණය කිරීමට සැරසෙන අතර ෂහබාස් ෂරීෆ් රජය විසින් මේ සඳහා අනුමැතිය ලබා දී ඇත. මෙම කෘත්‍රිම දූපත මුහුදේ තෙල් ගවේෂණය කිරීමේ කටයුතු සඳහා ස්ථිර වේදිකාවක් ලෙස භාවිතා කිරීමට නියමිත අතර, පාකිස්තාන පෙට්‍රෝලියම් ලිමිටඩ් (PPL) ආයතනය විසින් මෙම ව්‍යාපෘතියට නායකත්වය ලබා දෙනු ඇත.
ඇමෙරිකා එක්සත් ජනපදයේ ජනාධිපති ඩොනල්ඩ් ට්‍රම්ප්ගේ සහයෝගය ලැබීමෙන් අනතුරුව පාකිස්තානය මෙම තීරණයට එළඹ තිබේ. ඇමෙරිකාව සහ පාකිස්තානය එක්ව එරට විශාල තෙල් නිධි සංවර්ධනය කරන බවත්, එම තෙල් සම්පත සොයා ගතහොත් ඉන්දියාවට පවා එය අලෙවි කළ හැකි බවත් ට්‍රම්ප් පසුගිය ජූලි මාසයේදී ප්‍රකාශ කර තිබුණි.
මෙම නව ව්‍යාපෘතිය යටතේ කෘත්‍රිම දූපත ආධාරයෙන් අරාබි මුහුදේ තෙල් ළිං 25ක් කැණීමට පාකිස්තානය සැලසුම් කර ඇති අතර ඊට අදාළ ඉංජිනේරු ටෙන්ඩර් කටයුතු ළඟදීම අවසන් වීමට නියමිතය.
මුහුදේ ඇති වන රළ පහරින් ආරක්ෂා වීම සඳහා අඩි 6ක් උසට ඉදි කෙරෙන මෙම දූපත ලබන පෙබරවාරි මාසය වන විට වැඩ අවසන් කිරීමට අපේක්ෂා කෙරේ. මීට පෙර මුහුදු රළ හේතුවෙන් විදුම් ව්‍යාපෘතිවලට බාධා පැමිණියද, මෙම ස්ථිර වේදිකාව හරහා බර යන්ත්‍රෝපකරණ ක්‍රියාත්මක කිරීමෙන් එම ගැටලු මගහරවා ගනිමින් පැය 24 පුරාම කැණීම් කටයුතු සිදු කිරීමට හැකි වනු ඇත.
මෙටිස් ග්ලෝබල් ආයතනය පෙන්වා දෙන පරිදි මෙලෙස ස්ථාවර වේදිකාවක් භාවිතා කිරීම මගින් ව්‍යාපෘතියේ වියදම 33% කින් පමණ අඩු කර ගත හැකි අතර අයහපත් කාලගුණය නිසා සිදුවන ප්‍රමාදයන්ද මග හැරෙනු ඇත. පසුගිය වසරේ සැප්තැම්බර් මාසයේදී පාකිස්තාන මුහුදු සීමාවේ විශාල තෙල් හා ගෑස් නිධියක් සොයා ගත් බවට තහවුරු වූ අතර, සමහර වාර්තා පෙන්වා දෙන්නේ එය ලොව සිව්වන විශාලතම තෙල් හා ගෑස් නිධිය විය හැකි බවයි.
කෙසේ වෙතත්, මෙම නිධියෙන් සම්පත් ගොඩගැනීම සඳහා වසර 4 සිට 5 දක්වා කාලයක් ගත විය හැකි බවත්, පර්යේෂණ කටයුතු සඳහා පමණක් කෝටි 42,000ක පමණ මුදලක් වැය විය හැකි බවත් ඇස්තමේන්තු කර ඇත. දැනට ලෝකයේ බොරතෙල් සංචිත අතර 50 වැනි ස්ථානයේ පසුවන පාකිස්තානය සිය තෙල් අවශ්‍යතාවයෙන් 80%ක්ම ආනයනය කරන අතර, මෙම ව්‍යාපෘතිය සාර්ථක වුවහොත් එය එරට ආර්ථිකයට සහ ‘බ්ලූ වෝටර් ඉකොනොමි’ සංකල්පයට විශාල ශක්තියක් වනු ඇත.
