පවතින අයහපත් කාලගුණික තත්ත්වය හේතුවෙන් බදුල්ල දිස්ත්‍රික්කයේ ස්ථාන 6ක සිදුවූ නායයෑම්වලින් පුද්ගලයින් සිව්දෙනෙකු ජීවිතක්ෂයට පත්ව ඇති බව බදුල්ල දිස්ත්‍රික් ලේකම් කාර්යාලය තහවුරු කරයි.
බදුල්ල දිස්ත්‍රික් ලේකම් පණ්ඩුක අබේවර්ධන මහතා සඳහන් කරන්නේ මෙම ආපදා තත්ත්වය හමුවේ තවත් පුද්ගලයින් නව දෙනෙකු පමණ අතුරුදන්ව ඇති අතර ඔවුන් සොයා සහන සේවා කණ්ඩායම් අඛණ්ඩව මෙහෙයුම් දියත් කර ඇති බවයි.
ශ්‍රී ලංකාවට ගිනිකොණ දෙසින් පැවති අඩු පීඩන කලාපය මේ වන විට පීඩන අවපාතයක් දක්වා වර්ධනය වී ඇති අතර එය මඩකලපුව සිට කිලෝමීටර් 210ක් ගිනිකොණ දෙසින් කේන්ද්‍රගත වී තිබේ.
කාලගුණවිද්‍යා දෙපාර්තමේන්තුව අනතුරු අඟවන්නේ මෙම පද්ධතිය ඉදිරි පැය 12 තුළ ගැඹුරු පීඩන අවපාතයක් දක්වා තවදුරටත් තීව්‍ර වී උතුරට බරව වයඹ දෙසට ගමන් කිරීමට වැඩි ඉඩක් පවතින බවයි.
මෙම කාලගුණික පද්ධතියේ බලපෑම මත උතුරු මැද සහ වයඹ පළාත්වලට මෙන්ම ත්‍රිකුණාමලය දිස්ත්‍රික්කයට මිලිමීටර් 200 ඉක්මවූ ඉතා තද වැසි අපේක්ෂා කෙරෙන අතර දිවයින හරහා පැයට කිලෝමීටර් 60-70 පමණ වන තද සුළං ද ඇතිවිය හැකිය.
ධාරා ප්‍රදේශවලට ලැබෙන අධික වර්ෂාපතනය හේතුවෙන් දැදුරු ඔය සහ කුඹුක්කන් ඔය ආශ්‍රිත පහත් බිම් ප්‍රදේශවල ඉදිරි පැය කිහිපය තුළ අධි ගංවතුර තත්ත්වයක් ඇතිවීමේ අවදානමක් පවතින බව වාරිමාර්ග දෙපාර්තමේන්තුව නිවේදනය කරයි.
මීට අමතරව මල්වතු ඔය, නිල්වලා ගඟ, කැලණි ගඟ, බදුලු ඔය, මහවැලි ගඟ, මහ ඔය සහ කලා ඔය යන ද්‍රෝණිවල ජල මට්ටම් ඉහළ යමින් පවතින බැවින් ඒ අවට පහත් බිම්වල වෙසෙන ජනතාව ගංවතුර අවදානම පිළිබඳ දැඩි විමසිල්ලෙන් පසුවිය යුතුය.
කැලණිවැලි දුම්රිය මාර්ගයේ නාරාහේන්පිට සහ බේස්ලයින් දුම්රිය ස්ථාන අතර ස්ථාන දෙකකදී දුම්රිය මාර්ගයට ගස් කඩා වැටීම හේතුවෙන් එම මාර්ගයේ දුම්රිය ධාවනයට ද බාධා එල්ල වී ඇති බව දුම්රිය දෙපාර්තමේන්තුව සඳහන් කරයි.
