සමාජ මාධ්‍ය සඳහා වයස් සීමා පැනවීමට ඕස්ට්‍රේලියානු නව කම්කරු රජය යෝජනා කර ඇති අතර එමඟින් අවුරුදු 16ට අඩු දරුවන්ට Instagram, TikTok, Snapchat හා X ඇතුළු සමාජ මාධය තහනමට ලක් කිරීමට යෝජිතව ඇත.
නව පනත පිළිබඳව කෙටුම්පත ප්‍රසිද්ධ කිරීම සමග එරට ආන්දෝලනයක් ඇතිව තිබෙන අතර පැය 24ක් තුළ පැමිණිලි 15,000ක් පමණ ලැබී ඇතැයි වාර්තා විය.
එයට ප්‍රධාන හේතුව වූයේ එලොන් මස්ක් මෙම කරුණ පිළිබඳව සිය X පිටුවේ අදහස් දැක්වීමයි.
රජය මෙහිදී තදින් සිටින්නට නියමිතය අතර සමාජ මාධ්‍ය සමාගම් වලට දරුවන් මෙම වේදිකා භාවිතයෙන් වැළැක්වීමට සාධාරණ පියවර ගැනීමට සිදුවන බැවින් එසේ නොකළහොත් මිලියන 50ක දඩයකට යටත් වීමට සිදුවන බව ද දන්වා ඇත.
කෙසේ වෙතත් දෙමාපියන්ට හෝ පරිශීලකයන්ට දඩ පැනවීමක් සිදුනොවනු ඇත.
ඕස්ට්‍රෙලියානු රජය සහ විපක්ෂය මෙම තීරණය සාධාරණීකරණය කරන්නේ තරුණයන්ගේ මානසික සෞඛ්‍ය සහ ආරක්ෂාව සඳහාය. කෙසේ වෙතත්, සමහර මානසික සෞඛ්‍ය සංවිධාන මෙම තහනම නිසා දරුවන් තවත් හුදකලා විය හැකි බවට අනතුරු අඟවා ඇත.
Digital Industry Group Inc (DIGI) වැනි සමාජ මාධ්‍ය නියෝජිත ආයතන යෝජනා කරන්නේ සම්පූර්ණ තහනමක් වෙනුවට වේදිකා ආරක්ෂාව වැඩි දියුණු කිරීම වඩා සුදුසු බවයි.
එලොන් මස්ක් මෙය ඕස්ට්‍රේලියානු ජනතාවගේ අන්තර්ජාල ප්‍රවේශය පාලනය කිරීමේ උපක්‍රමයක් ලෙස විවේචනය කර ඇත.
හරිත පක්ෂය සහ ස්වාධීන සෙනෙට් සභිකයන් මෙම පනත ඉතා ඉක්මනින් පාර්ලිමේන්තුවට ඉදිරිපත් කිරීම විවේචනය කර ඇත. අගමැති ඇන්තනි ඇල්බනීස් පවසන්නේ මෙය නව ප්‍රජා ප්‍රමිතියක් පිහිටුවීමක් බවත්, ලොවක් මෙම නීති දෙස බලා සිටින බවත්ය.
පනත සම්මත වුවහොත්, සමාජ මාධ්‍ය සමාගම්වලට නව නීති වලට අනුගත වීමට මාස 12ක කාලයක් ලැබෙනු ඇත.
මෙම යෝජිත පනත පිළිබඳව විවිධ පාර්ශ්වයන්ගේ විරුද්ධත්වය පැන නැගී ඇති අතර, එය ඉතා කඩිනමින් පාර්ලිමේන්තුවට ඉදිරිපත් කිරීම පිළිබඳව බොහෝ දෙනා සිය නොකැමැත්ත පළ කර ඇත. කෙසේ වෙතත්, රජය සහ විපක්ෂයේ සහය මත මෙම පනත සම්මත වීමට නියමිතය.
